Real Lewe Take 4

Real Lewe Take 4

By die gemeente se kleingroep (kategese):
Die jongmense het geleer hoe om versoening te bring in gebroke verhoudings. Hulle het 'n dokument ontvang wat hulle sal help om konflik op 'n gesonde manier te hanteer.

Die film "inside out" vertel die verhaal van 'n dogter en haar gesin wat verhuis. Haar belewenis van die trek word uitgebeeld deur emosiekarakters binne-in haar. Toe alles vir haar te veel raak, besluit sy om na hulle ou dorp terug te gaan. Sy was baie kwaad vir haar ouers en hulle verhouding was stukkend. Kyk op Youtube na die snit"Inside out - Sadness helps Riley" (Dit sal goed wees as julle die hele fliek kan kyk.) Wat gebeur hier tussen die dogter en haar ouers wat meebring dat hulle hulle verhouding kan herstel en met mekaar versoen kan word?

Lees saam: 2 Korintiërs 5:16-21:

16   Ons beoordeel dus van nou af niemand meer volgens menslike maatstaf nie. Al het ons Christus vroeër volgens menslike maatstaf beoordeel, nou beoordeel ons Hom nie meer so nie. 
17   Iemand wat aan Christus behoort, is 'n nuwe mens. Die oue is verby, die nuwe het gekom. 
18   Dit alles is die werk van God. Hy het ons deur Christus met Homself versoen en aan ons die bediening van die versoening toevertrou. 
19   Die boodskap van versoening bestaan daarin dat God deur Christus die wêreld met Homself versoen het en die mense hulle oortredinge nie toereken nie. Die boodskap van versoening het Hy aan ons toevertrou. 
20   Ons tree dus op as gesante van Christus, en dit is God wat deur ons 'n beroep op julle doen. Ons smeek julle namens Christus: Aanvaar die versoening met God wat Hy bewerk het! 
21   Christus was sonder sonde, maar God het Hom in ons plek as sondaar behandel sodat ons, deur ons eenheid met Christus, deur God vrygespreek kan wees.

Gesels saam:
1. Lees weer 2 Korintiërs 5:20-21. Wat het God gedoen om ons verhouding met Hom te herstel (om ons met Hom te versoen)?
2. In vers 17 lees ons daar het nou 'n nuwe lewe vir ons aangebreek op grond van God se versoening met ons. Hoe lyk hierdie nuwe lewe?
3. Wat beteken die woorde in vers 18 dat hierdie bediening van versoening nou ook aan ons toevertrou is?

Leef met God se seën:
Dink aan verhoudings in julle elkeen se lewe waar versoening nodig is. Gebruik die hulpmiddel wat die jongmense ontvang het as 'n riglyn en gesels oor stappe wat julle kan volg om in hierdie verhoudings versoening te bring. As julle nie die hulpmiddel gekry het nie, vra julle leraar daarvoor. Dit is hulpmiddel 2 onder Ontmoeting 9 op die DVD.